مسرح الشارع.. جانب من مسرحيتي (محطات) تأليف جبار القريشي/العراق,,,,,,,,,,,,,,,,,,,

ج١ مسرح الشارع.. جانب من مسرحيتي (محطات) تأليف جبار القريشي/العراق. الخطاب المسرحي (خمسة من الشباب على شكل مسحراتية، يبدأ العرض بتوجههم نحو الجمهور وهم يضربون على الطبل.). المحطة الاولى: الجميع: سحور.. سحور، إگعد يا نايم، هنيالك ياصايم.. سحور..سحور. ممثل ١: سحور.. أگعد يانايم، تره الفرصة ومضة بليل هندس، چلب بيهه قبل ما يفوتك القطار. الجميع: هنيالك ياصايم. ممثل٢: سحور.. أگعد يانايم، لحگ على قطعة قماش من قميص إرثك المنهوب، غطي بيهه عورتك، قبل ما يفضحك العوز. الجميع: هنيالك يا صايم. ممثل٣:سحور.. أگعد يانايم، وترس عيونك ضوة گبل ما تنباگ شمس الله بوضح النهار. الجميع: هنيالك يا صايم. ممثل٤:سحور.. اگعد يا نايم وحط إصبعك بعين الباگوك، قبل ما تصحه وتلگه إيدگ من دون إصابع. الجميع: هنيالك يا صايم. ممثل٥:سحور.. إگعد يانايم واحفر گبرك بيدك قبل ما تموت وماتلگة مكان تندفن بيه. الجميع: سحور.. سحور، إگعد يا نايم، هنيالك يا صايم، سحور. المحطة الثانية: أحدهم يصرخ: إحترگنه، حريق.. حريق. (فجأة يتحولون الى رجال إطفاء، وكل يحمل بيده مطفأة، يركضون الى اتجاهات مختلفة) ممثل١: حريق..حريق والحرائق أنواع. ممثل ٢: أكو حرگ بالنار. الجميع..يغنون.. (النار أصيح النار.. حرگتني من مريت، وبحالي مدري شصار). ممثل ٣: وأكو حرگ بالتيزاب. الجميع: أويلي.. نار ولا تيزاب. ممثل ٤: وأكو حرگ بالكهرباء. الجميع: هيه وينهه الكهرباء!؟. ممثل٥: وأكو حرگ بالعيون. (الجميع.. يغنون). (شحچي وشگول عليك..نص وجهك عيون..العيون..العيون..حلوات العيون). ممثل ١: وأكو واحد بطبيعته حاروگة. (الجميع..باندهاش). أويلي.. حاروگة حاروگه..!!؟. ممثل١: إي حاروگة. ممثل٤: وأكو أكله إسمهه محروگة إصبعه. (الجميع.. باندهاش). محروگة إصبعه..!؟. ممثل٤: إي محروگة إصبعه، هاي شبيكم، مسامعين بيهه مماكلين!؟. الجميع: ماكلين.. بس مسامعين. (يتوجه بسؤاله للجمهور..) ممثل٤: يابه أكو واحد بيكم مسامع بالمحروگة إصبعه؟. الجمهور: ......... ممثل٤: المحروگة أكلة العوائل الفقيرة بايام الحصار. ممثل٣: وأكو ناس تحرگ گلوب ناس. (الجميع.. بأندهاش) ناس تحرگ گلوب ناس..!؟ ليش؟. ممثل٣: خباثة. ممثل ١: وأبو المثل يگول..(نارهم تاكل حطبهم). الجميع: وببو زايد. ممثل ٥: الله يحرگ گلب كلمن تسبب بحرگ وطن آمن بنار فتنة نايمة وأيقظهه. الجميع: آمين. ممثل١: ولكي لا ننسى، أكو حرگ عضال مستعصي بقسم العقود، وين متكون بأي طابق تطاله النار. الجميع: والحرگ على الجرار. المحطة الثالثة: (ينطلق صوت قطار، فجأة يتقاطرون أحدهم يمسك بقميص الآخر من الظهر، ويتحولون الى أشبه مايكون بقطار.. يقلدون صوت القطار). ممثل ١:عووو.. ياجماعة.. تره العمر محطات والناس قطارات، والقطارات أنواع. ممثل٢: عندك مثلا.. قطار صاعد. الجميع: مثل سعر صرف الدولار. ممثل٣: وقطار نازل. (الجميع.. يغنون). (نازل ياقطار الشوگ، نازل هاي ديرتنة). ممثل٤: وقطار جاثم. الجميع: جاثم على گلوبنه. ممثل٥: وقطار تايه، مايدري وين الوجهة مالته، واحد يوديه شرگ، والاخر يوديه غرب. الجميع: هذا أكيد قطارنا. ممثل١:صاعد نازل جاثم، هي هاي الدنية. الجميع: والمشكلة إحنة مدري بياقطار راكبين؟، وين وجهتنة؟، ومنو يتحكم بينه؟. ممثل١: مثل ماگلتلكم، القطارات أنواع، بس وين هذا صاحب الحظ السعيد اللي يلگيلة قطار أمين يوصلة للمحطة اللي يريدهه. ممثل٢: والمحطات ترة هم أنواع، ممثل ٣: تلگه محطة مكتضة بالناس والحركة. ممثل٤: ومحطة مهجورة، مابيهه غير قطارات مهجورة جاثمة على سچة مهجورة. ممثل٥: ومحطة بعدهي تحت الانشاء، تحتاج هواي وقت وجهد حته تجهز. ممثل٢: ومحطة مرهونة بيد ناس يديروهه من وراء الكواليس. الجميع: واحنة الله العالم، مدري بيامحطة نزلنة. المحطة الرابعة: (صوت ينطلق فجأة) حرامي.. حرامي. (يتحولون الى حراس ليليين، كل يحمل بندقية وصافرة،). (الجميع.. يطلق صافرة). فكوا عيونكم، البيت أمانة، والحرامية هواي. (ممثل ١..بمرارة) شالفايدة.. وسياج البيت واگع. الجميع: السياج ينبني ويتصلح، بس فكوا عيونكم، البيت أمانه، والحرامية هواي. (ممثل٢.. بمرارة) شالفايدة، والحرامي منه وبينه، عايش بيناتنه. الجميع: لابد بيوم تطلع الشمس عالحرامي. بس فكوا عيونكم، البيت أمانه، والحرامية هواي. (ممثل٣.. بمرارة) شالفايدة، حرامي البيت من يگدر عليه، الجميع: لا تستعجل، لابد يوم يعثره الزاد والملح. بس فكوا عيونكم، البيت أمانة، والحرامية هواي. (ممثل٤..بمرارة) شالفايده، واللي ينلزم بالجرم المشهود، ثاني يوم يطلق سراحه. الجميع: ماتظل هيچ، ربك على ساعة ويگلب عاليهه على سافلهه، بس فكوا عيونكم، البيت أمانة، والحرامية هواي. ممثل٥: شالفايدة، إذا چان أبو البيت يتعمد يعوف الباب مفتوح للغريب حته يبوگه. (الجميع.. يسحبون الأقسام) لا..كلشي ولا هاي، البيت بيتنه، واشحده الغريب يتجاوز عتبة بابه. ياگاع إنشگي وبلعيني. (الجميع يغنون الاغنية التراثية). (إبيتنه ونلعب بيه، شلهه غرض بينه الناس، لابينه الغمازة، ولابينه اللمازة، ولابينه الميحب الملعب، ميلوا غاد عن دربنه.). المحطة الخامسة: (يتحولون الى أشبه مايكون بمتصوفين يضربون على الدفوف ويدورون حول أنفسهم وحول بعضهم وهم يتمايلون.) الجميع: دار دور.. يامغرور... الدنية برمشة عين تدور. دار...دور. ممثل١: الساعة تدور. ممثل٢: الشمس تدور. ممثل٣: الگاع تدور. ممثل٤: الراس يدور. ممثل٥: والدنية برمشة عين تدور. الجميع: دار دور.. يامغرور.. الدنية برمشة عين تدور. ممثل١: ما يدوم اله وجه الكريم. الجميع: دار دور يا مغرور، الدنية برمشة عين تدور. ممثل٢: لو دايمة لغيرك، چان دامت للمنصور. الجميع: دار دور يامغرور، الدنية برمشة عين تدور. ممثل٣: إبنِ فِيلَل، إبنِ قصور.. بس لا تنسة وراك گبور. الجميع: دار دور يا مغرور، الدنية برمشة عين تدور. ممثل٤: فرهد، بوگ.. إظلم، جور.. تاليهه يدفنك عاشور. Enter

تمت إعادة توجبه رسالة بواسطة Neeran ج٢ الجميع: دار دور يا مغرور، الدنية برمشة عين تدور. ممثل٥: چَذِب، خَطِط.. لَمِع، صَفُط.. بنگرة ظلمة باجر تنحط.. وكلهه تسميك المقبور. الجميع: دار دور يامغرور، الدنية برمشة عين تدور. دار.. دور... دار.. دور. المحطة السادسة: (فجأة ويتحولون الى برنامج مسابقات، والجميع بهيئة غسالي سيارات، كل يمسك بسطل ماء وقطعة قماش، وممثل١، هو من يقدم البرنامج.) ممثل١: أعزائي المشاهدين، مرحبا بكم في برنامج سين جيم، غسل وتشحيم. (الجميع..يرفعون أيديهم ابتهاجا، ويرددون)، سين، جيم.. غسل وتشحيم. ممثل١: سؤال اليوم هو.. عدد أنواع الغَسِل؟. (الجميع يرفعون أيديهم بالحاح لغرض الاجابة، إستاد..إستاد.. يختار منهم ممثل٢) ممثل٢: إستاذ، غسل الشوارع، وسمط الكوارع. ممثل١: نعم، أحسنت، غسل الشوارع، عظيم.. عظيم، بس هاي چانت گبل، هسه الشوارع تِنِشِل إذا غسلوهه. (الجميع..يصفقون فرحا، ويرددون) سين جيم، غسل وتشحيم. ممثل٣: إستاذ غسل العقول، على طول. ممثل١: نعم، غسل العقول، على طول، أحسنت، عظيم.. عظيم. هواي عقول وسخه يرادلهه غسل. (الجميع..يتقافزون فرحا، ويرددون) سين جيم، غسل وتشحيم. ممثل٤: غسيل الأموال، في جميع الأحوال. ممثل١: يا سلام.. غسيل الاموال، في جميع الاحوال، عظيم.. عظيم. أموالنه كلش نظيفة، الجماعة ميقصرون، يومية غاسليهه، والنظافة من الايمان. (الجميع..يتقافزون فرحا، ويرددون). سين جيم، غسل وتشحيم. ممثل٥: إستاذ.. وأكو ناس، الله غاسلهم بسبع شطوط، بعد ماغسلونه غسل، الله يغسلهم دنية وآخره. ممثل١: برافو عليك..برافو، يعني غسل ولبس، برافو.. برافو. (الجميع.. يطوحون بايديهم في السماء كتعبير عن فرحهم، ويرددون.). سين جيم، غسل وتشحيم. (ممثل١.. وهو يمسك بعدد من الظروف،) مبروك عليكم، ربحتوا بطاقة هجرة جماعية على متن قارب مجهول يوديكم المصير مجهول، حته تخلصون بجلودكم من الغسل، وتگضون باقي أعماركم تسبحون بالبحر الميت، مبروك.. مبروك. الجميع: الله يبارك بيك استاذ، (يتقافزون، وأحدهم يحضن الآخر كتعبير عن الفرح .). المحطة السابعة. (يتحولون الى متسولين، كل واحد منهم بنظارة سوداء وعصى يتوكأ عليها، كل يمشي باتجاه.). الجميع: من مال الله يامحسنين، في سبيل الله. (ممثل١.. بمسكنة، يرفع يديه بالدعاء،). يارب، أصير سياسي چبير، أبوگ الفرحة من عيون الفقير. الجميع: آمون. م٢: يارب أصير برلماني، وغرگ الناس بالأماني. الجميع: آمون. م٣: يارب أصير رئيس كتلة، وأي واحد يوگف بطريقي أكتلة. الجميع: آمون. م٤: يارب أصير رئيس برلمان، وابني فلل ومولات بعمان. الجميع: آمون. ممثل٥ : يارب أصير رئيس حكومة، وأخلي داير مدايري إشچم بومة، وأخلصهه سفرات ومؤتمرات ومهاترات. الجميع: آمون. ممثل١: يارب أصير رئيس حزب، وأگضيهه چاي وچذب. الجميع: آمون. ممثل٢: يارب أصير رئيس عصابة، وأسس شركة مال نصابة. الجميع: آمون. ممثل٣: يارب أصير رئيس نزاهة، وكوش على صيفها وشتاها. الجميع: آمون. ممثل٤: يارب اصير رئيس لجنة، واللي مايدفع أسجنة. الجميع: آمون. ممثل٥ : يارب أصير رئيس مليشيا، وأعينلي إشجم واحد شقاوة، وأگوم آخذ خاوة. الجميع: آمون. ممثل١: يارب أصير سفير، وأعينلي مدير مكتب حقير، وأشتغل عالبارد، يگولون بيهه خوش وارد. (الجميع..بصوت عالي) آموووووون. ممثل٢: يارب أشتغل حرامي. (ينظرون اليه باستغراب). ممثل٢: لا تستغربون من كلامي، ممثل٣: لا يابه ليش نستغرب. ممثل٤: الحرامية ها الايام سوگهم ماشي. ممثل ٥: يضمون فلوسهم جوة الكاشي. (الجميع ينفجرون بالضحك والبعض يستلقي على ظهره وبعضهم على بطنه من الضحك.).

ج٣ المحطة الثامنة. (فجأة ويتحولون الى فتاحي فال، كل واحد منهم يشد راسه بخرقة خضراء ويحمل مبخرة ويدورون بين الجمهور.). الجميع: (من العين والجن.. من ناب الذيب والسن.). (ممثل١..يقوم بدور إعلامي ويجري لقاءات معهم،). ممثل١: گلي هاي الأموال اللي تخمطوهه. على يا باب تنفقوهه؟. ممثل٢: بالحقيقة والواقع. (ممثل١.. يقاطعه). ممثل١: فوتلي عالمباشر شيخنه، وعوف الحقيقة والواقع. ممثل٢: آ آ آ.. باب فيد واستفيد، ولا تفكر بعيد. الجميع:(من العين والجن.. من ناب الذيب، والسن.). ممثل١: ماعلاقتك بالدين؟. على اعتبار ريوگك زيتون وتين. ممثل٢: أخي.. تره إحنه ناس متقين. وعلى أموال الناس مؤتمَنين. (ممثل١..متهكما) ههه.. وبالدين متسترين. الجميع:(من العين والجن.. من ناب الذيب والسن). ممثل٣: رجاءً.. لا تسويلنه طلابه. گلنالك كلشي بحسابه. ممثل١: أشهد أنكم عصابة، غشاشين ونصابة. الجميع:(من العين والجن.. من ناب الذيب، والسن.). ممثل٤: إستاذ.. إحنه تره ولد الملحه، المايل نعدله، والعاطل نصلحه. ممثل١: يابه تره الدين مو لحية وسبحه. وأي واحد يتقاطع وياك تذبحه. الجميع:(من العين والجن.. من ناب الذيب والسن). (ممثل١.. بعصبية). يابه والله ثبرتونه.. وبالعين والجن كفرتونه.. دإنطونه مجال عاد. الجميع:(من العين والجن.. من ناب الذيب، والسن). ممثل١: اللهم صبرچ يا روح. ممثل٥ : أخي إحنه كل واحد شهادته بطولة، وبهواي مسابقات ماخذين البطولة. ممثل١: ماشاء الله، ماشاء الله.!، وعلى گولة من گال، وين أكو واحد معيدي، راح جاب شهادة من مريدي. ممثل٥: يامريدي هذا؟. ممثل١: يابه، هذا مثل، والامثال تضرب ولا تقاس. الجميع:(من العين والجن.. من ناب الذيب، والسن). ممثل٥: ها.. واشبيه مريدي؟، لعلمك أكثر تيجان الراس شهاداتهم مختومة بختم الحاج مريدي، بالمناسبة مريدي معترف بيه دوليا. ممثل١: لا والنعم عاد من مريدي. الجميع:(من العين والجن.. من ناب الذيب، من السن). ممثل١: على حچايتك اصحاب الفخامة والسيادة والمعالي كلهه خريجة جامعة مريدي!؟.. ممثل٢: لا واليعجبك مصدقة ومختومة. ممثل٣: وچماله مسويلهه صحة صدور. ممثل٤: وداخلة ومحفوظة بسجل الشهادات. ممثل٥: ومصنفة ضمن تصنيف جامعات شنغهاي. ممثل١: لا هاي هيه، حصلنه. الجميع:(من العين، من الجن....). (ممثل١.. يصرخ مستاءاً.) يوووووه.. يمعودين.. والله خبلتونة، لك ياعين!؟، يا جن!؟. هي همج. المحطة التاسعة: (الجميع يحملون بأيديهم مراوح ورقية بدائية يدورها الهواء، يدخلون بين صفوف الجمهور، يسألونهم. ) (ممثل١..يسألهم بألم). بس لا واحد بيكم إسمه صالح؟. آني أمي سمتني صالح، وأهلي ربوني تربية صالحة، چنت أسعد إنسان، لكن للاسف إفترت الدنية بيه، لگيت نفسي أعيش بزمن غير صالح، وبيئة غير صالحة، آكل طعام غير صالح، أشرب ماي غير صالح، واتنفس هواء غير صالح، ما خليت باب مادگيته بلكت ألگيلي فرصة عمل، ماحصلت، ومثل متشوفون تالي عمري إضطريت أبيع فرارات. الجميع: فرارات.!؟، لا.. حرامات. ممثل٢: حالم..!، إياكم وبالكم واحد يسمي إبنه حالم. آني هم أهلي غلطوا وسموني حالم، طول عمري چنت سعيد ومتفائل، أحلم أحلام جميلة، وبلحظة إفتر بيه الزمن، لگيت نفسي أتعس إنسان، كل البيبان إنسدت بوجهي، فاضطريت أبيع فرارات. الجميع: فرارات!؟، لا.. حرامات. ممثل٣: ماعنده عقل اللي يسمي إبنه مسافر؟. آني أهلي سموني مسافر، گلت أعيش حياتي كلهه ترحال وسفر، تالي متالي إفترت بيه الايام، لگيت حالي أبيع فرارات. الجميع: فرارات!؟. لا.. حرامات. ممثل٤: مشكولة ذمته اللي يسمي إبنه جابر، آني أمي غلطت سمتني جابر، وذبت سري بالمگابر، گالت يمه اريد الله يجبرني بيك، بعدين خطية ماتت مكسورة خاطر، وراها دولبني الوكت دولاب يابو دولاب، هواي ناس دگولي صدورهم من چانوا محتاجيني، تالي متالي بعد ماباگوا صوتي لگيت نفسي ملگوح بالتقاطعات ابيع فرارات. الجميع: فرارات!؟، لا.. حرامات. ممثل٥: آني متأكد هواي من عدكم إسمه سعيد على إسمي. بس ياسبحان الله، من يوم اللي ولدتني أمي وآني تعيس، وين ماوجهه ماتجي بيدي، تالي متالي إضطريت ابيع فرارات. الجميع: فرارات!؟، لا.. حرامات. (يتحدثون الى الجمهور ويرددون..). (الجميع: فرارات، فرارات.. الناس بنص الظلمة تبات.). (ممثل١..بألم وحسرة) منو منكم مثل حالي!؟. طول النهار أفتر مثل المرصعة أبيع فرارات، بس أريد أجيب الراس عالراس ماگادر. ممثل٢.. يبكي بأسى). أمي الله يرحمهه، گضت عمرهه تفتر من بيت البيت حته تكبرنه، تالي ماتت ومحد من عدنه وگف عليهه، لأن الدنية شتتنه كل واحد شمرته تحت نجمة، وهسه آني گدامكم أبيع فرارات. (ممثل٣.. يبكي بحرقة) أبوي الله يرحمه دولبته الدنية، خلص عمرة مجيش، مكلفية وثلث احتياطات، تاليهه تعوق بأحد المعارك، گضاهه يفتر على عربانته الى ان مات وهو يبيع فرارات، وبعدين آني إستلمت الصنعة منه. (ممثل٤.. يجهش بالبكاء). من عمري ست سنين لزمت الشارع أبيع فرارات حته أعيش أمي وخواتي، لا مدرسة ولا زواج ولا مستقبل. واللي يكتلك بعض الناس يتنمرون عليه يگلولي، مو عيب عليك شاب وتبيع فرارات وإنت واگف على بحر مال نفط!، (هازءاً..) هُوَ وينه النفط!؟. (ممثل٥.. يبكي بمرارة). آني الله يچرم حققت حلم أمي وأبوي وخلصت ماجستير، ماخليت مسؤول ما دگيت بابة على وضيفة، وتالي متالي أيست، مزگت الشهادة وگعدت أبيع فرارات، هو هذا الحلم اللي ضيعت شبابي عليه!؟.. (الجميع: فرارات.. فرارات.. الناس بنص الظلمة تبات) (يوزعون فرارات على الجمهور). ستار.